المراه الليبية

ريت الولية كارهة الكوجينة ، اليوم تشتغل ماتريد تشقي بينا ، تريد عملها ، كرهت الحوش و كرهت راجلها ، ديما الكادر هو ايلي شاغلها ، اتريد واسطه تجري ع التسكينة ، ف الصبح تبكر للعمل شايلها ، وآخر الخدمه شي ما لينا ، و لا فايده ياصاحبي اتحصلها ، يكمل مرتبها زلوف و زينة ، تغير اللبسه دوم و اتبدلها ، وم السوق تشري عطور ثمينة ، م الحوش تطلع سيبت عيلها ، و حنتها اتعاني تاعبه مسكينة ، فضلة العشاء وقت الغداء تاكلها ، و حكاكي الفول و السردينة ، و لابت الفرشه ابروحها تغسلها ، ف المغسله مسكين كاثر دينه ، تشكي و تبكي كاثرات اسبالها ، ديمه مريضه ماسكه التركينة ، تبي زياره كل يوم لهلها ، و العيب نمشو خاليات ايدينا ، مازلت عازب و الحياة نجهلها ، لكن مواقف م لصحاب خذينا ، شينك حياة كيف المرار عسلها ، حياة مرمدة تمت وخيذة شينة*
كارهة مطبخها ، تجي باطله تقول شغلها دوخها ، لا ادير كسكسو و لاطنجره اتبوخا ، ع البايت عليه خدينا ، حكاكي التن و دحيتك تطبخها ،لنا زمان ماطيب لذيذ كلينا ، و شاتك نهار العيد كي تسلخها ، بقولة تعب و موش راضيا بينا ، وحياتك مرمدة ياصاحبي مبيخها ، ارضينا بالهم والهم موش راضي بينا

*مي مهتمه ، ف الصبح شغل و العشية لمة ، و الحوش حايس ماتريد اتلمه ، و يبقي نهار اسود انكان حكينا ، و قبل العزومه نعقدو في قمه ، قدام ضيفنا خايف اتكشف بينا ، و الراجل عويله شالهم شور امه ، من يوم يومهم واخدين ع التقزينة ، التمن عليه ظروف كاثر همه ، قاصر علي تعباية البنزينة ، امقصره امعا جاره و خاله و عمه ، و هذين الظروف و شي مو بيدينا
*ماتفضاله ، و الراجل ايعاني حالته مي حاله ، لو كان تلقي عندها شغاله ، و للفرش تبقي دايرة ماكينة ، و يبقي نهار في خربة الغساله ، و تقول عمرنا مانغسلو بيدينا ، افراد عيلته منها جميع زعاله ، كي ماتحط النار و البنزينة ، موش كلهن و كي هالحالة ، منهن ايلي ارباوة اجواد و زينة ، ارباوة اجواد و للصغا حماله ، و ماعمرها دارت نهار الشينة ، بين الجواجي همها شيالة ، ماتبوح لاتحكي اسرار دفينة ، يالله وضعنا غير جميع احواله ، جيناك من ظلم الزمان شكينا ، شوخة الصبايا من غيبة الرجالة ، و لا ظروف و حاكمات علينا .
ماتزعلنش يا ليبيات عارفينكن صقوعيات بكل ههههه

بس مش كل الليبيات هكي اصابع ايديك مش كيف بعضهن

مشكوووووووور
لكن مش كلهن هكي

انا مع البنات صح
بس الشعر نايس اي لايك ات..منور وخيي يعطيك الف عافيه صحيت

صحيت خوي ......من ناحية موضوعك حلووو و فيه جو فكاهي..............ومن ناحية ثانيه رأيي مع البنات ان مش كل الليبيات هكي في منهن بس مش كلهن...........مشكور

ههههههههههههه حلو بكل منووووووووووووور وصحيت

اذا كان مش علينا نحنا ليش سميته المراة الليبية
بس بجد كلام حلو وتركيبه حلو بكل من الاخير توبيك نايس بكل
مشكور الاعزل

مشكوووووووووورين جميعا ع مروركم اسعدني .... تحياتي

مشكوووووووووورين جميعا ع مروركم اسعدني .... تحياتي

مشكوووووووووورين جميعا ع مروركم اسعدني .... تحياتي

انتن هكي البنات الله غالب معندي ما انديرلكن هههههههههه