يوم من ايام الليبي "مذكرات الزغدة"

- صباح الخير .......

- يا لطيف في سري هو الي يشوفك يشوف خير

- وين ماشي

- ماشي نحضر فيلم يعني وين صبح وين نبي نمشي ماشي للعمل طبعا

- وكنك شاطح

- ما هو غباء على الصبح ما شور شي

- باهي عطيني فلوس قبل ما تعدي

- صبح يا فتاح فلوس عليش بس ليه هل السيرة السيئة على الصبح

- يا زغدة نبي فلوس سبحان الله نبي نمشي للكوافير اليوم عندي فرح

- كوافير هذا فيش يبيع شنوا تبي تشري وبعدين فرح من هذا

- كوافير يا جاهل هذا كيف الحلاق عندكم يعني مزين وماشية فرح بنت خالتي

- لسانك هذا يبي قص وبعدين هل الفرنساوية إلي عندك تتفخمي بيها وقوليلي

فرح بنت خالتك من المغفل هذا الي خذاها هذي لا ضي ولا اميت هذه

مشروع انثى و فشل

- اسم الله على سماحتك أنت..... انا الي بختي عطيب طحت في هل الشكل

مش عارف كيف خذيتك بس

- هذا سببها سحر امك لقيت روحي متزوج بس قلت نصبر طامع في حور

- باهي باهي بلا كثرة كلام عطيني فلوس راهو نلقبها لك نكد على الصبح

- أنتي اساساً تقلبي على أي جهة فهيا نكد مافيش جهة تفرح مافيش فلوس

اقلبي على الجهة الي تبيها وبعدين المزين شنوا يبي ايدير هذه خلقة ربي

على رائي المثل ( شنوا ادير الماشطه في الوجه العكر)


- يا راجل قول صبح وأنت وجهك يجيب عشرة ايام قبلي طيج سعدك كانوا

العرسان بالطابور قدام حوشنا

- ايه طابور بس ظهره لحوشكم ووجها للشارع ويجري ، رحمي على سحر

أمك لولاه راك قاعد مطوحة في حوش هلك

- انت قريب متت علشان تخذني أمك حفن رجليها على حوشنا وهي تقنع فينا

- عارف عارف ماهو انا طول عمري امتعبها وكانت ديما تدعي ان شاء الله

اطيح طيحت على سطار خشمك وجت مش على خشمي بس لا على وجهي كله

لدرجة علمة حتى في قفايا

- باهي بلا كثرة دوا ما تخليش الشيطان يخش بينا

- أي شيطان يا ولية الي يبي يجي شورك حتى الشياطين عندها شوية ذوق

ربي بلاني واني صابر وأنتي ربك رزقك احمديه

- باهي من الأخير ولدك الكبير راهو شرط سرواله إمتاع المدرسة جيبله واحد

ثاني والفرخة الصغيرة الابلة قالتلها جلدي كتباتك جيب معاك شوية قرطاسية

- ربي ايجيب خبرك وانتي ما اتجيبي غير في الخباره الشينة كلها دفع ومصاريف

- شنوا نبي انقولك يعني طلعلك ورث ولا هلك لقوا تحت حوشهم كنز ما هو انتم

عائلة فقرية وجهكم ايجيب الفقر

- على اساس بنت الباشا الي وخذها انا الله يرحم بوك كان امنيته يمسك ورقة عشرة

دينار صحيحة

- مصمص فمك بالزهر قبل ما تدوي على بوي كان راجل مسقم والناس تحلف براسه

- انمصمص فمي بالزهر بعد ما نحكي على بوك مش قبلها لان سيرته مزفره والناس مش

تحلف براسه تحلف على راسه لانه راسه شكل الخبزة اليابسة

- هذا جد عيالك الي تحكي عليه راهو

- ايه عارف هذا عليش مش خايف على مستقبلهم لان الي هذا جدهم مالهمش مستقبل

- انت من الاخير شنوا تبي

- عارفة شنوا نبي نبي مارد مصباح ياخذ العويلة يردهم لبطنك وياخذك انتي

يردك لحوش هلك تقعد دنيا سعيدة وحياة لونها بمبي على رائي فريد الاطرش

- فريد الاطرش يا جاهل هذا عبدالحليم حافظ الي غناها

- لا حول الله عبدالحليم حافظ راجل يلعب في الكورة شنوا دخله بالغناء

- باهي يا متاع الكورة تبي تعطيني الفلوس ولا لا

- حاضر حاضر ولا يهمك امغير يوزعوا الثروة توا نعطيك الي تبيها

- انا ما نبي غير اتوبيس 28 راكب يشيلك من وجه الدنيا الي جهنم طول

- ياريت ونرتاح منك بس وصيتي صلي وصيمي بيش اتخشي الجنة

- صحيح يا زغدة تبيني انخش الجنة ( وجها فرح ونحمر)

- ايوة لاني في النار وما شور شي اتجي ورايا مش ناقصة القصة

- انا عارفة بختي طحت في راجل مفلس كيفك مع اني سيبت ولد عمي راجل مقتدر

- يا مسكينة ولد عمك من القطط السمان وهو توا يقولوا جاي دورهم يلموا فيهن

- ولا ما يلموا الا الكلاب الجرب الي زيك

- (ضربة على الراس مع صرخت ) تأدبي يا ولية وقولي يا صبح

- حرام عليك يا زغدة اخرتها اتمد يدك عليا

- السانك جايبلك الضرب عارفة انا شاك فيك من زمان شكلك إرهابية

ويمكن اليوم نبلغ عليك عمي اوباما اسف بوعمامة بلكي يشيلك لجونتاناموا قبل ما يسكره

- وهما ناموا معش ناضاو بكل قاعدين نايمين

- منوا هذوم

- عيت جونتا مش ناموا معش ناضوا بكل

- نامت عليك حيطه على رائي حماده المصري جارنا والله الجهل مصيبة

انتي بس وريني كيف تبي تخشي معايا ليبيا الغد والله ما فيها غد طول ما فيه

عقليات متخلفة زي عقليتك

- ليبيا الغد هذه وين موقعها بعد اجدابيا ولا قبلها

- ليبيا الغد يا جاهلة ما تشوفيش في اللافتات الي في الشوراع هذين كلهن ليبيا الغد

- اما لافتات الي تحكي عليها امتاع مشاريع الابراج والملاعب و المستشفيات الي علقهون

بعد جيبت حميده ولدي اما انتا دايخ حمادي توا خاش للإعدادي ولا ناسي

- توا شنوا دخل حميده وحمادي ليبيا الغد هذه يعني الغد اليوم هو اليوم وكل يوم تقعد الغد

وبعدين الي يرجى خير من الي يتمنى

- ا ه زي القرض السكني الي ترجى فيه من قبل زيجتي

- ماهي زيجة غبره تعرفي معش نبيه القرض خلاص بطلت دبينا ليبيا الغد جايا عليش نحط في

ديون على رقبتي لا لا الحياة جتقعد مية مية شوفي اللافتات

- يا راجل اوعى لروحك وعدي دبر خدمه تجيب منها فلوس ولا نقولك قطعنا طرف من اللافتة

نسكنوا فيها

- انتي شكلك من اعداء البلد وإنسانة حقوده انا عارفك ورجعية وامبريالية وصهيونية اب عن جد

خايف شي يوم نلقاك على الجزيرة .

- والله عطبك عليا طيحة في هل الراجل بس غالب الله القلب وما يريد

- ( يضحك الزغدة بفخر) عارف روحي طخ طخ امغير نبي مسلسل تركي ونوريك الجو

عارفة نبي انخش نرقد اخرى بيش اندير صبح جديد ونوض دسي روحك راني نصبح بيك اخرى



هذا الحوار ليس له علاقة بالواقع ولا يعبر على رائي الكاتب ابدا ابدا لا سمح الله انا مرتاح

واموري مية مية وربي يجعل كلامنا خفيف عليهم امغير بصارة
منقول...

ههههه مشكورة عليا ء على الطرح الرائع والسرد الاروع وهذا واقع بعض الناس فعلآ ........

هههههههههههههه طخ طخ عليك جو العرايك وهما الاثنين لساناتهم يبيلهن اعادة تأهيل
شكرا لانك حطيتي الضحكة على وجهي :lol
تقبلي مروري