جهــز روحـــكـ ......

جهز روحك آن أوانك
جاك السيل أنت وأعوانك
حان عقابك
حان حسابك
تدفع غالي حق الغالي
الوطن اللي مصيت دماه
الشعب الليبي رأسه عالي
أهو صار بعون الله
يهدم بنيانك وأركانك

جهز روحك
جهز روحك .. جنك جي
خيل أحفاد هذاك الشايب

فعل أحفاده ما هو دي
مد وضرب مسقم صايب
كتائب جنهم بعد شوي
قالوا كانت فيه كتايب
واللي منهم م الموت أنجي
استسلم .. روّح طايع تايب
الشعب الليبي دمه حي
جنوب وشرق وغرب حبايب
عليك إتحدوا خي وخي
إلتموا داروا فيك عطايب
وفيّ يساند فيه وفيّ
يقولوا ترابك ما هو سايب
يا أم تراب يعز علي
دون ترابك دمي رايب
الله أكبر .. والله قوي
يواطي شانك قادر ويطفي بركانك

جهز روحك جاك الدور
وين ملاذك
كيف خلاصك
جوك بوادي .. وجوك حضور
السيل قرب من حيطة ساسك
ملّوا م الظلم وم الجور
من غدرك .. من خبث أنفاسك
تافه .. دجال .. ومغرور
جرثومة أنت وأنجاسك
كبود بغيظ ودم تفور
موتورين يريدوا رأسك
أقسم بالله وموش زور
قريب تشرب حنظل كأسك
شباب الثورة .. عطر ونور
ونار تذوب شدة بأسك
فراسين .. جوارح وصقور
والجرذان أنت وحراسك
أخسأ مذموم ومدحور
خسرت رهانك
خسرت حياتك .. وإيمانك

جهز روحك آن أوانك
جاك السيل أنت وأعوانك
حان عقابك
حان حسابك
تدفع غالي حق الغالي
الوطن اللي مصيت دماه
الشعب الليبي رأسه عالي
أهو ثار
وحق الله
وحق الله
وحق الله
وحق الله
يهدم بنيانك وأركانك
جهز روحك