لو كان غير من باب الوفا........

الشاعر ‏.. محمد الشيخي

لو كان غير من باب الوفا شاورنا .. ما ايريد يربحنا ولا يخسرنا

لطّ رحـيله .. ودار دورة الـعاقـب نـهار الـشـيلة

لو كان غـير شاورنا هذيك الليلة .. امعاه في هذيك وهذى ما قصرنا

مغير كل حد عنده طريق اتشيله .. واحنا طريقـنا من يوم فيها سرنا ..

ألها عـيار ما نرضوا عيار بديله.. واموالف علي شضّ الحمول ظهرنا

وموش عيب لا عاب الخليل خليله .. حتى فــ البطون يعاركن (لمصرنة)

رد الشاعر .. صالح بوعياد الشهيبي

لوكان غير من باب الوفا شاورنا .. ما ايريد يربحنا ولا يخسرنا

لو كان رد الــشيرة .. رانا اخترنا له الراي الخيرة
لا انبصروا لا نعرفوا تبصيرة .. احنا عـمرنا فــ الجد ما بصرنا

سوا راينا ايديره سوا ما ايديره .. الـمـهم رانا جلوته صدّرنا

رد الشاعر .. عبدالسلام بوجلاوى الفاخرى

لوكان غير من باب الوفا شاورنا .. مـا ايـريـد يربحنا ولا يخسرنا

عزيز ألقيـته .. من غير علمنا مختار دار لبيته
بلا أسباب سبّب بينا تشميتة .. الله يـهـديــه بـمــوقفه دردرنا
لوكان غير بلّغنا بما فى نيته .. وحط العلل في لـرض وأدّابرنا

نين نفهموا منه أسباب بليته .. وليش وعليش بـغـيرنا غيرنا ؟!!

رد الشاعر .. محمد الممهور

لوكان غير من باب الوفا شاورنا .. مـا ايـريـد يربحنا ولا يخسرنا

لو كان عدّ رفقنا .. وخـطـم وشاور قـبـل لا يفارقنا
بالـك انجوه براي بيه وثقنا.. حتى ما خـذابه لاخره عبرنا
وبالك يـشـابك مرفقه مرفقنا.. نجاوروه وانديروا اللي تسترنا
ومنين ما على يسار الطريق عزقنا.. صغرن اقـداره راه مـا صغّرنا

ولا يشــطـنا مـا صـار لا يقـلقنا.. هو اخـتـار واحـنـا للكريم صبرنا

رد الشاعر.. عبدالرحمن بوصوكاية

لو كان غير من باب الوفا شاورنا .. مايريد يربحنا و لا يخسرنا

لـو كـان هو صـارحنا .. وخبّر برايه قبل ما يفضحنا

كـنـّا مـشـيـنا لـعـاقـلـين طرحنا ..عليهم المـوضوع و اشّاورنا
وكـنـّا انـديرو راي في صالحنا .. صـالـح يـجـمـّعنا وماودرنا
ولكن خسارة هالعزيز سلحنا .. سلحت قديم الثوب ما دورنا

بــاع الـغـلا واحـنا اللي ربّحنا .. الـلـي باعنا انبيعوه ماكدرنا

رد الشاعر .. السايح البوسيفي

لو كان غير من باب الوفا شاورنا .. مـا ايـريـد يربحنا ولا يخسرنا

لوكان وسّع باله .. تعوذ من الشيطان حط ارحاله
تمّهل صبر عـــ القيل واللي قاله .. غربل وصفى اللي بها غسورنا
ركز وشاف وقال شن درناله .. لين فى حفيرة حضرته حدّرنا
هو عارف اللي ايدير فيه فساله .. رايد بها فى خاطره يقهرنا
اتقول دم له عنده قديم ايساله .. ما ايجيب غير اللي اتجيب ضررنا
وتو ينفعه لو ما برمش افعاله .. يخسر بضعف أضعاف ماخسرنا

ويشبح الله في حالتي وفى حاله .. هلي علي عروق الندى كوّرنا

رد الشاعر .. صلاح عبيد

لوكان غير من باب الوفا شاورنا .. مـا ايـريـد يربحنا ولا يخسرنا

لو كان حـتى وفّا .. وزّن امـوره بـيـن كـفـي وكـفـه
عـدْ الأيـام الـلـي لطـمـهـنْ غـفّا .. كـسـّر زهـاويـهـن وزاد كـسرنا
نـسـا وقـت كـان بـجـمـرتي يدفّا .. نـسـي كـل شـي تـقـول ما دمرنا
مـا سـال عـنـي كـيـف نـا نـشـفـّا .. فـــ غـيـبـتـه ندعـي الله يـجبرنا
هـمـّش نـدايـا راح نـوري طـفـّا.. نـسـا فــ الحـقيقة كان زمان قمرنا
يـاريـت خـبـرني وقال حذفـّا.. رشــادة غـلانا والبـعـيـد دفـرنا
الـلـي واجـعـتنـي خدعـته بـالعفّا.. قـول الـلـطـافة قـول بـيه بـهرنا
الـلـي واجعـتـني كنت نا في صفّا.. ونـحلف عليه نقول ما يغدرنا
أمـأمن أسـراري لـيـه داخل رفّا.. غـربـال تـاريـتـه وزاد كدرنـا
يامـا زرعـنـا ورود هـو صـيـفّا.. يــامـا حـكـيـنا عـــ الـغلا وسمرنا
يـامـا يـامـا . شـوق يـامـا صفّا.. بــــ أكلاش الجفا فرّغ وما عبرنا
تـاريـتـه غلانـا كـان عنده نفّا.. استنشق . تكيـف بعدها وطمرنا

الحاصل وجعني ما حكالي وحفّا .. شـور الجديد اللي كسر خاطرنا

رد الشاعر .. صالح العبار

لو كان غير من باب الوفا شاورنا .. ما ايـريـد يربحنا ولايخسرنا

يا ريت جا وحكالى .. وفضه على روحه وجا وشكالي
يلقانا سند وأصحاب له فــ التالي .. والحمل الـثقيل انشيل لو يدبرنا
ونحموا الرمية كان جانا جالي .. وانشيلوا عـنـاه الجار لاجاورنا

ونحمل العيب ودوم واسع بالى .. ما اتدردره حاجة غريق بحرنا

رد الشاعر .. ناصر بوعجيله الشيخ

لوكان غير من باب الوفا شاورنا .. ما ايـريـد يربحنا ولا يخسرنا

لو كان هو راجعنا .. واسمع راينا واحنا رايه سمعنا

لو كان هذا درنا راي زين جمعنا .. وقرعتنا عطا فــ الراي وادابـرنـا

خذا راينا والله رايه اتبعنا .. المـهـم رانـا عـــ الصلاح عـمـرنـا

لو كان رد علينا.. رانا عـطـيـنـا والكلام خـذينـا

ورانا علـيه ابراينا رايينا .. وبالراي السليم معاه ما قصّرنـا

والله جاب راي مقنع و بيه ارضينا .. الـمـهـم بـالشـيـرة جبر خاطرنا

لا دين سلّك لا سلك في دينه .. بلا امشاورة سافر عزيز هجرنا

ردالشاعر .. أكرم الكاسح

لوكان غير من باب الوفا شاورنا .. ما ايـريـد يربحنا ولا يخسرنا

لوكان غـير تباطـى .. وجا سـالنا الشيرة انفكو رباطه
موش هك يرحل فـــ الخفا بزقاطة .. لا عـد خاطرنا ولا دورنا
ولا كان شـامـت دارنا رغّاطة .. ولا كان لايم لامـنا ونـزرنــا

رد الشاعر .. خالد المجبري

لو كان غير من باب الوفا شاورنا .. ما ايريد يربحنا ولا يخسرنا

لو كان في تخطيمه .. جانا وسكّرنا أملاف قديمة
لكن بلا توديع راه ظليمة .. لنا الله وهو اللي يصبرنا
علي بيعته لنا بلا تسويمة .. وعن كسرته بقل الوفا خاطرنا
وعن جرح تما غير ناقل ديما .. من جية الشامت اللي خبّرنا
وعن عين مازالت لها تبليمة .. من يوم ما فارق فراق قهرنا

وكان غير شاورنا بعد تسليمه .. بالربح قلناله وما كدرنا

رد الشاعر .. ابوريان

لو كان غير من باب الوفا شاورنا .. ما ايريد يربحنا ولا يخسرنا

لو كان يا غالينا .. خدينا معاك وفي الكلام عطينا
نخلط ونقسم ما عليك علينا .. وندفع الزائد كانّا قصرنا

إلا اللوم ما نقبل نهار يجينا .. نكبر مع الميعاد ما يصغرنا

رد الشاعر .. حافظ سليمان الشيخي
لو كان غير من باب الوفا شاورنا .. ما ايـريـد يربحنا ولا يخسرنا
لو كان هو جارحنا .. شاور نهار الشيل ما انجرحنا
لا ايريد يشرينا ولا يربحنا .. ولا يزيح عنا همنا وكدرنا
ياما مع جاوي الصوب مدحنا.. لو الشور رده را براي عمرنا

رد الشاعر .. عز الدين التريكي
لو كان غير من باب الوفا شاورنا .. ما ايريد يربحنا ولا يخسرنا
لو كانهو راجانا .. لو كان عــ اللي فـــ خاطره حاكانا
ما كنت ناو العين يوم حزانا .. لا كنا ذرفنا دمعنا غدّرنا
شد الرحيل بهونته فاجانا.. عدى رقد مو عادته يسمرنا
جرحه صعب مصعب علي نسيانا .. يا مسهل عليه طياح ما عمرنا
ذرفنا علي اللي بسيته كافانا .. اللي قبل ما يغدر اليوم غدرنا
ياما مشينا بشوقنا و هوانا .. وسط الجناين ما نهار عثرنا
وسط الجناين دايرين عزانا .. فـــ كل الأماكن حلمنا بعثرنا
انتمم كلامي بالصلاة لمولانا .. عوضي عليه إن شاء الله يصبرنا

مشكور اخي علي الكلمات الرائعه ............تحياااااااااااااااااااااتي

العفو د.امينة تسلمي أنتي أروع وشكرا على مرورك نورتي الموضوع تحياتي لكي

العفوااااااااااااااااااا اخي منور بوجودك الموضوع .......

لو كان عدّ رفقنا .. وخـطـم وشاور قـبـل لا يفارقنا
بالـك انجوه براي بيه وثقنا.. حتى ما خـذابه لاخره عبرنا

بجـــــد أكثر من رائعة .......منــــــــــور المنتدى بالكلمات الرائعة........صحيت

العفو....الأزرق الحزين ...المنتدى منور بوجودك أنتي مشكورة

تســـــــــلم ..........والعفـــــــــــــــــــــــــــو

» الوفا......